Dega e LDK-së për Norvegji, situatën e përgjithshme në Kosovë e vlerson në suaza të angazhimeve institucionale dhe angazhimeve serioze të faktorit politik për realizimin e synimeve kombëtare, të proklamuara edhe me Progarmin e Presidentit Rugova dhe të LDK-së.

Dega e LDK-së në Norvegji i shprehë mirënjohjen dhe konsideratën e saj popullit të Kosovës për atmosferën e qetë dhe gjendjen stabile në kuadër të realitetit në të cilen gjendet vendi ynë.

Situatën brenda LDK-së, pas vdekjes së Presidentit Rugova, Dega e LDK-së në Norvegji e vlerëson jo ashtu siç pritej, mobilizimin e të gjithëve në LDK për të vazhduar me realizimin e objektivave programore e nacionale, një unitet mobilizues çfarë e kërkoi vazhdimisht Presidenti ynë historik z. Rugova dhe vullnet e gatishmëri për të ecur me dinjitet rrugës dhe hapësirave të lirisë që AI i trasoi.

Megjithate dega e LDK-së në Norvegji ka besim të plotë në kuadrat që ka LDK-ja, prandaj mbështetë pa rezervë punën e Presidentit Fatmir Sejdiu, të Kryetarit të Parlamentit Kolë Berisha , Qeverinë e Kosovës si dhe gjithë ministrat e e saj, veçantë të LDK-së në punën që po bëjnë në realizimin e standardeve për Kosovën, procesin e negociatave me shtetete fqinje si dhe përpjekjet e pandalshme për përmirësimin e jetës së çdo qytetari të Kosovës. Poashtu ne përkrahim parezervë punën e Grupit Parlamentar të LDK-së në Kuvendin e Kosovës në krye me dr. Alush A. Gashin që po koordinon aktivitetet dhe punën e tij në përkrahje të zhvillimit të përgjithshëm të Kosovës.

Dega e LDK-së në Norvegji i jep mbështetje Komisionit për ndryshime në statutin e partisë, njëherit respekton rekomandimet e komisionit si dhe vendimet e Kryesisë dhe Këshillit të Përgjithshëm lidhur me datën e mbajtjes së zgjedhjeve në LDK.

Në proceset nëpër të cilat po kalon Kosova, zgjedhjet brendapartiake karshi negociatave për statusin e Kosovës, duhet të vlerësohen dhe analizohen racionalisht e pastaj të vendoset se kur do të mbahen.

Dega jonë e kupton vakumin institucional brenda LDK-së, të krijuar në LDK pas 21 janarit të këtij viti, dhe gjithashtu mirëkupton debatet që ka filluar, gjithnjë në kufijt e rregullave të parapra në Statutin e LDK-së, por gjithashtu kërkojm përgjegjësi më të madhe tek të gjithë në ruajtjen e unitetit në parti.

Është e vërtetë se strukturat udhëheqëse të partisë, përkrah detyrave institucionale në realizim të standardeve si kusht për realizimin e Pavarsisë së Kosovës, kanë para vetes dhe sfidën, ndoshta më të madhe të LDK-së që nga themelimi i saj, organizimin e zgjedhjeve partiake, tashmë pa liderin historik të saj Dr. Ibrahim RUGOVA.

Në këtë kontest, kryesia ka nevojë për mbështetje nga të gjitha strukturat partiake dhe anëtarësia e saj që me devotshmëri i përmbahet programit politik e nacional të Presidentit Rugova.

Për ne janë të pakuptueshme por jo aq shqetësuese, vlerësimet në disa media të shkruara dhe elektronike se LDK-ja është ndarë në LDK-istë dhe Rugov-janë!!! Kjo për mendimin tonë nuk qëndron dhe është imponim artificial i të tjerëve, sepse në LDK të gjithë janë “LDK-istë” dhe sigurisht të gjithë “RUGOV-janë” dhe mbi të gjitha të gjithë kemi obligim ndaj liderit tonë të madhë, Dr. Ibrahim Rugova, të punojmë në rrugën e trasuar nga ana tij.

Ata që bëjnë ndarje të tilla i shërbejnë përçarjes dhe politikave bajraktarsite e lokaliste që do të dështojnë që në nismë. Përmendja e emrit të Presidentit Rugova, në këtë drejtim negativ, është e pamoralshme dhe e pafalshme edhe pse mund të vijë nga sish që para 16 vjetëve nuk e njihnin as LDK-në dhe as Presidentin Rugova.

Ata që në emër të LDK-së dhe Presidentit kanë bërë pasuri dhe kanë fituar poste të pamerituara, ata që përmes familjarizmit dhe metodave meskine e amorale kujtojnë se mund të përfitojnë vota, bëjnë gabimin më të rëndë. LDK në Kosovë e edhe Dega në Norvegji i di dhe i njeh të gjithë veprimtarët e devotshëm që kurr nuk u luhatën nga rruga e Presidentit dhe e LDK-së, prandaj kot vrapojnë të “blejnë” ose të “shesin” vota në emër të interesit të Kosovës, e kurr të LDK-së.

Ndarjet e tilla “plastike” kur po dihet tashmë nga vijnë dhe cili është qëllimi i tyre, pavarësisht edhe nëse dikush brenda LDK-së u shërben verbërisht, konsiderojmë se duhet ta mobilizojnë anëtarësinë në krejt Kosovën, sidomos Kryesinë qendrore të partisë, që të rifunksionalizojnë aktivitetin politik në drejtim të krijimit të politikës unifikuese dhe vepruese e cila do të sjell vendime që LDK-në e vërtetojnë si forcën më të madhe politike e cila duhet dhe mund ta realizojë pavarësinë e Kosovës, atë për çka dr. Rugova u angazhua deri në fund të jetës së Tij.

LDK në Norvegji e konsideron të pakuptueshme dhe i vlerëson si hapa të ngutshëm fillimin e fushatës zgjedhore të njëanshme nga individë të caktuar, pa u shpallur zgjedhjet në parti, megjithë respektin që kemi për kandidatët e mundshëm për Kryesi dhe për kryetar të LDK-së.

Është koha dhe momenti historik që LDK të veprojë pa imponime dhe pa elementin karrierist , prandaj apelojmë anëtarësinë dhe strukturat tjera të partisë që ta mbështes Kryesinë qendrore si dhe të gjitha institucionet e dala nga vota e lirë në përpjekjet për pavarësinë e Kosovës.

Dega e LDK-së për Norvegji, gjatë punës shumvjeçare të saj, është angazhuar në senzibilizim të opinionit vendas për situatën në Kosovë, ajo ka mobilizuar bashkatdhetarët për të ndihmuar Kosovën, qytetarët dhe institucionet e saja.

Dega e LDK-së për Norvegji do të vazhdoj punën e saj, duke pas për bazë programin e LDK-së në realizim të Pavarësisë së Kosovës si dhe në demokratizimin e zhvillimin e vendit.

Ideja a Presidentit historik të Kosovës, Dr. Ibrahim Rugovës, ka qenë dhe do të mbetet objektiv i punës tonë.