Në Bergen u vlerësua niveli i deritanishëm i realizimit të objektivave të procesit të Bolonjës në dritën e objektivave të arsimit evropian deri më vitin 2010 dhe është miratuar Komunikata e Bergenit për kahet e zhvillimit të mëtejmë të arsimit të lartë në Evropë gjatë dy viteve të ardhshme deri në takimin që do të mbahet në Londër në maj 2007.

Ministri Veliu dhe Drejtori Rexhaj kanë zhvilluar një sërë aktivitetesh gjatë tri ditëve të qëndrimit në Bergen: kanë marrë pjesë në punën e grupeve të ekspertëve dhe në seancat plenare ministrore, kanë zhvilluar takime të shumta pune dhe konsultimi me ministrat evropianë të arsimit, si me ministrin e Turqisë, Malit të Zi, Austrisë, Norvegjisë Bosnjë e Hercegovinës etj. Përveç kësaj janë zhvilluar takime dhe konsultime me udhëheqës e përfaqësues të Asociacionit të Universiteteve Evropiane (Kryetari Prof. Dr. Ëinkler), Këshilli i Evropës (Z. Sjur Bergan), UNESCO Z. George Abbat dhe me zyrtarë e ekspertë të tjerë të shumtë në fushën e Arsimit të Lartë në Evropë. Në këto takime është biseduar për zhvillimin e mëtejmë të bashkëpunimit ndërmjet MASHT dhe këtyre institucioneve, janë dakorduar orare të vizitave të ndërsjella, dhe janë biseduar çështje aktuale në fushën e arsimit të lartë në Kosovë.

Gjatë punimeve të Konferencës janë pranuar pesë anëtarë të rinj të procesit të Bolonjës përmes nënshkrimit të Kartës së Bolonjës.

Kosova do të vazhdojë të mbajë statusin e vëshguesit të këtij procesi, pasi që nuk është nënshkruese e Konventës Kulturore Evropiane të Këshillit të Evropës.

Në Konferencë është konstatuar suksesi i arritur në vendosjen e sistemit të sigurimit të cilësisë, sistemin e niveleve të studimit, në njohjen e diplomave dhe në mobilitetin e

studentëve. Këtu është dakorduar dhe miratuar komunikata e Bergenit e ministrave evropianë që mbulojnë arsimin e lartë e që për periudhën 2005 - 2007 e vë theksin në: raportin ndërmjet kërkimeve shkencore dhe studimeve të doktoratës, implementimin e standardeve dhe udhëzimeve për sigurimin e cilësisë sipas raportit të ENQA-s, implementimin e kornizave kombëtare të kualifikimeve, dhënia dhe njohja (nostrifikimi) i diplomave të përbashkëta (përfshirë nivelin e doktoratës), krijimi i mundësive për shtigje fleksibile të nxënies në arsimin e lartë, përfshirë procedurat e njohjes së nxënies së mëparshme, etj.

Delegacioni i MASHT-it pati takime edhe në Ministrinë e Punëve të Jashtme, ku takoi zv. drejtorin gjeneral të Seksionit për Marrëdhënie me Ballkanin Perëndimor, z. Jan Braathu si dhe përfaqësues të Ministrisë së Arsimit dhe Kërkimeve. Në këtë takim u bisedua për mbështetjen afatgjate të Qeverisë Norvegjeze për projektin e Institutit të Gazetarisë e Komunkimit të Kosovës (KIJAC) si dhe projekte të tjera në fushën e arsimit. Z. Jan Braathu konfirmoi mbështetjen e plotë të Qeverisë së tij për projektin e KIJAC dhe kërkoi bashkëpunim më të ngushtë me MASHT-in. Ai tha se Qeveria e tij dëshiron që të mbështesë institucionet demokratike të Kosovës. Ndërsa delegacioni kosovar falënderoi Qeverinë e Norvegjisë për projektet e realizuara në arsimin e Kosovës si dhe shprehu pajtim e gatishmëri të plotë për zhvillimin e mëtejshëm të bashkëpunimit.

Delegacioni i arsimit kosovar në takimin që u mbajt në Parlamentin e Norvegjisë takoi parlamentarin Haakon Blankenborg të cilin e njoftoi për situatën në Kosovë dhe gjendjen aktuale në arsim. Z. Blankenborg mbështeti projektin e KIJAC-it si dhe projektet tjera që ka realizuar Qeveria Norvegjeze jo vetëm në arsim, si dhe u interesua për fushat e bashkëpunimit dhe mundësitë për të ndihmuar Kosovën në të ardhmen, ndërkaq që u bisedua edhe për nevojat në arsimin kosovar dhe mundësitë për të ndihmuar këtë fushë të rëndësishme. Në takim me Parlamentarin norvegjez u bisedua edhe për standardet e arritura, vështirësitë në implementimin e tyre si dhe zhvillimet aktuale në Kosovë.

Delegacioni i MASHT gjatë qëndrimit në Kristiansand, pati takim me drejtorin e Departamentit të Arsimit të kësaj komune z. Jyrgen Kristiansen si dhe me drejtorin e Gjimnazit “Katedraleskole” z. Arne Rosenvold e cila më 1997 është binjakëzuar me Gjimnazin “Xhevdet Doda” të Prishtinës. Në këto takime u bisedua për mësimin plotësues në gjuhën shqipe që zhvillohet në komunat norvegjeze ku jeton komuniteti shqiptar, ndërsa z. Rosenvold u interesua për rivënien e kontaktit me Gjimnazin “Xhevdet Doda”, një delegacion i të cilit është ftuar të vizitojë këtë shkollë norvegjeze, në mënyrë që të zhvillohet miqësia e bashkëpunimi.

Ministri Agim Veliu dhe delegacioni i MASHT gjatë qëndrimit në Norvegji takuan edhe përfaqësuesin e shoqatës së studentëve shqiptarë e cila numëron mbi 100 anëtarë, i cili u interesua për mundësinë e bashkëpunimit dhe ndihmën e ndërsjellë në mes të MASHT-it dhe shoqatës studentore shqiptare nga Norvegjia.

Më 18 maj, delegacioni i MASHT-it i udhëhequr nga Ministri Veliu vizitoi Shkollën e Gazetarisë dhe të Komunikimit Gimlekollen. Në këtë Qendër të mediave, Ministri Veliu u njoftua nga udhëheqësit e saj, me punën që bëhet në gazetarinë televizive, atë të radios, gazetarinë e shkruar .

Projekti i Institutit të Gazetarisë dhe Komunikimit i Kosovës i financuar nga Qeveria Norvegjeze pritet të nisë me punë në vitin e ardhshëm akademik dhe profesorët Keneth Andresen, Oyvind Aadland dhe Kore Melhus theksuan se pajisja dhe teknologjia bashkëkohore që përdoret në GSJC do të instalohet edhe në IGKK.

Në mbrëmje Ministri Veliu me delegacionin e MASHT-it takuan komunitetin shqiptar në Kristiansand dhe Kryetarin e Degës së LDK-së z. Daut Haxhaj. Në këtë takim z. Veliu njoftoi pjesëmarrësit për situatën e përgjithshme në Kosovë, me theks të veçantë për punën e

MASHT-it si dhe u përgjigj në interesimet e bashkëtudhëtarëve lidhur me mësimin plotësues në gjuhën shqipe.

Në përgjithësi, ishte kjo një vizitë e frytshme me kontakte të shumta, intensive e shumë të dobishme për sistemin e arsimin e arsimit të lartë në Kosovë dhe për zhvillimin e tij në vitet që po vijnë me qëllim të lehtësimit të integrimit të tij në hapësirën evropiane të arsimit të lartë.